Crepe

بسم الله الرحمن الرحيم

 

 مادري ليش كنت أخاف أسوي الكريب !؟

من أسهل الأشياء اللي سويتها

كانوا جايينا ضيوف على غفلة وسويته قبل لا يوصلون بساعة

حشيته بنوتيلا وحطيت فوقه فراولة ومارشملو ورشيت شوية سكر ناعم

وعجبهم !

الحشوة ممكن تكون جوكلت

.. كسترد

.. آيسكريم

.. حشوات الفاكهة (مثل اللي تنحط على الجيز كيك)  

.. والخيارات وأفكار التزيين ماتخلص

وممكن بعد تكون الحشوة مالحة بس نلغي الفانيليا والسكر من الوصفة

الوصفة الأصلية من afnanetoo عالانستغرام

المقادير

 بيضتين

نص كوب ( حليب سائل )

م ص ( سكر )

نص م ص ( ملح )

م ص ( فانيليا )

نص كوب ( طحين )

شوية زيت

الطريقة

   نخفق البيض مع الحليب والسكر والملح والفانيليا

نضيف لهم نص كوب طحين ونخفق

ندهن الطابي/المقلى/التاوه بشوية زيت ونحمر الكريب من الجهتين

إذا كانت الحشوة نوتيلا يفضل نحشي كل حبة أول مانشيلها عن النار

يكون أسهل وهي حارة

 فيه ألف عافية 

خـنـفـروش

بسم الله الرحمن الرحيم

الخنفروش من الحلويات الشعبية القطرية اللذيذة

قبل عصر البترول كانوا يعتبرون الخنفروش من الأكلات المكلفة لوجود البيض ضمن مكوناته

عشان جذيه كانوا يسوونه في المناسبات السعيدة .. 

مثل الأعراس والأعياد وعودة المسافرين بعد طول غيبة 

طريقته خذتها من أمي اللي خذتها من جدتي اللي خذتها من جدة أمي الله يرحمها

وتعودنا ندبل (double) المقادير كل عيد ونوزع على أهلنا وجيرانا

 

المقادير

15 بيضة

11 فنيال / سكر

3 م ص / هيل

زعفران

كركم (عشان يعطي لون)

2 إلا ربع علبة / طحين جميع الاستعمالات

1 وربع علبة / طحين عيش ( رز مطحون )

{ المقصود بالعلبة هني علبة الأناناس الصغيرة .. وحدة قياس الطيبين :) }

 إذا ماتوفر طحين العيش نبدله بطحين عادي .. بس العيش يحليه ويخليه مقرمش ^_^

الطريقة

ننخل نوعين الطحين ونخلطهم مع بعض .. إذا تمت حبوب من طحين العيش في المنخل نحطها معاهم عادي

لأن هدفنا هو إن ندخل هواء

نخلط باقي المقادير ونضيف لهم الطحين بالتدريج

نخليه يتخمر 4 ساعات على الأقل ..

أمي الله يطول بعمرها تسويه قبل بليلة وتتركه يتخمر طول الليل وتكرفنا ثاني يوم من الصبح :))

نصبه بالملعقة على زيت حار ونحمره من الصوبين

احتمال كبير إن أول كم تجربة يطلعون مشوهين بس في النهاية بتضبط معاكم P=

فيه ألف عافية