بسم الله الرحمن الرحيم
بعد عدة محاولات فاشلة لأختي .. تعقدت من شي اسمه مكرون !
بس لما يكون الشي في خاطر الوالدة -عسى الله يطول بعمرها- يصير مافيه مفر من المحاولة
دخلت مواقع ومدونات وشريت كتب ومجلات .. وما عزمت أسويها لين شفتها في مدونة مريم (الله يحفظها)
المقادير اللي استخدمتها غير عن مقاديرها شوي .. خذتها من فيديو لسارة كيري
كوب وربع ( طحين )
كوب ونص ( سكر ناعم / بودرة )
بياض 4 بيضات ( نسيت أحطهم في الصورة D: )
نص كوب ( سكر عادي )
ربع ملعقة صغيرة ( روح اللوز ) >> أنا استخدمت الفانيليا بداله .. لأني أحب الفانيليا ^.^"
نخلط السكر الناعم مع اللوز
أنا خلطتهم مثل ما تشوفون في الصورة .. يتراوالي لو خالطتهم في المطحنة كان طلعت النتيجة أحسن
لأن اللوز لازم يكون نااااااعم
نخفق البيض لين تتكون عليه رغوة .. ونضيف عليه السكر العادي
لما تصير مثل ماهي في الصورة ( لما نسحب المضرب منها يترك أثر مكانه )
نقدر نضيف الفانيليا/روح اللوز و اللون اللي نبيه .. بس الألوان لازم تكون جل مب سائلة
ونشغل المضرب لين يختلطون
نحط اللوز على الخليط ونخلطهم
في هالمرحلة لازم نحاول نطلع كل الهوا اللي في الخليط .. لين مايصير ثقيل وناااعم .. يشبه العسل
يعني مضرب الشبك اللي استخدمته مهب أحسن وسيلة في هالمرحلة P=
أتوقع السباتيولا spatula بتكون أنسب
نحط القمع في كاس ونصب فيه خليط المكرون ( مادري ليش هالصورة تطلع عويه! )
إذا كان السليكون متوفر عندكم بيسهل عليكم ضبط شكل المكرون وايد
أول كم محاولة طلعوا فاشلين .. بس بعدين مشى الحال ^_^
إذا ما كان السليكون متوفر ممكن نستخدم ورق الزبدة مثل هالصورة
ما كانوا مضبوطين .. لو سويته على ورق شمع مرة ثانية برسم الدوائر على الوجه اللي يكون مقابل الصينية
بعد ما خلصنا نتركه لمدة ساعتين عشان ينشف .. هالخطوة مهمة وايد واجد كثيراً جداً فيري متش !
بعد ماينشف ندخله الفرن على 175 درجة سيليزية ( حوالي 350 فهرنهايت ) لمدة 15 دقيقة
هذا حسب الوصفة
الظاهر إن فرني حار .. فـ استوى المكرون في 10 دقايق وتغير لونه للأشقر :"(
بعد ما استوى ننطر عليه لين يبرد عدل .. إذا استعجلنا عليه بيصير هالشكل
أول ما نطلعه من الفرن يكون طري .. فـ تلصق قاعته بالصينية ويستوي مقعر
المفروض يكون سطحه أملس .. وإنه ينفش شوي .. عشان نقدر نقول إنه مكرون ناجح .. بس ما صار معاي جذيه
أهم شي الأخلاق 
نجي الحين للحشوات .. جربت 3 أنواع
غاناش جلكسي
غاناش جوكلت أبيض
حشوة بيتي كروكر للكيك بالفانيليا
صورة ثانية عويه =S
أخوي الصغير يحب البلوبيري عشان جذيه كنت ناوية أستخدم الجام .. بس يوم فتحته لقيته سائل بزيادة وهونت عنه
أحلاهم بالنسبة لي كان غاناش الجوكلت الأبيض
والنتيجة النهائية المب حلوة شكلاً ( بس والله الطعم حلو ^___^ )
ياريت إذا حد جربها وضبطت معاه يكتب لي في الكومنت أو يرسل لي الصور
سواء إن كانت هالطريقة أو غيرها
فيه ألف عافية
No comments:
Post a Comment