القهوة العربية ~ الطريقة القطرية

بسم الله الرحمن الرحيم

لعيون أختي الغالية بحط اليوم طريقة القهوة القطرية

وحده من أهم رموز الضيافة في ثقافتنا

والمرافق الدائم للحلو والتمر

مقاديرها

لتر ماي { مايكون حار ولا بارد }

فنيال { فنجال } قهوة عربية شقرا ومطحونة .. أنا أستخدم بن القطان الكحلي

نص فنيال هيل مطحون

م ص بهارات الإحساء للقهوة

م ص بهارات القصيم للقهوة

  

زعفران

الطريقة

1) نحط الماي + القهوة على نار متوسطة ونخليهم لين تفور القهوة

لين فارت نقصر عالنار ونخليها تطبخ ربع ساعة عالأقل

2) نحط الهيل + البهارات + الزعفران في الدلة

أنا أحب أكثّر من البهارات القصيمية وأقلل من الحساوية لأن الحساوية فيها مسمار { قرنفل } وايد

وبعد شفت في السوق بهارات إيرانية للقهوة بس ماجربتها !

3) نصب شوي من القهوة في الدلة ونسكرها ونخضها عشان نخلط البهارات مع القهوة

بعدين نصب فيها باقي القهوة ونخضها ,, وبعدين نخليها تركد شوي

ونكون خلصنا ^_^

فيه ألف عافية

خـنـفـروش

بسم الله الرحمن الرحيم

الخنفروش من الحلويات الشعبية القطرية اللذيذة

قبل عصر البترول كانوا يعتبرون الخنفروش من الأكلات المكلفة لوجود البيض ضمن مكوناته

عشان جذيه كانوا يسوونه في المناسبات السعيدة .. 

مثل الأعراس والأعياد وعودة المسافرين بعد طول غيبة 

طريقته خذتها من أمي اللي خذتها من جدتي اللي خذتها من جدة أمي الله يرحمها

وتعودنا ندبل (double) المقادير كل عيد ونوزع على أهلنا وجيرانا

 

المقادير

15 بيضة

11 فنيال / سكر

3 م ص / هيل

زعفران

كركم (عشان يعطي لون)

2 إلا ربع علبة / طحين جميع الاستعمالات

1 وربع علبة / طحين عيش ( رز مطحون )

{ المقصود بالعلبة هني علبة الأناناس الصغيرة .. وحدة قياس الطيبين :) }

 إذا ماتوفر طحين العيش نبدله بطحين عادي .. بس العيش يحليه ويخليه مقرمش ^_^

الطريقة

ننخل نوعين الطحين ونخلطهم مع بعض .. إذا تمت حبوب من طحين العيش في المنخل نحطها معاهم عادي

لأن هدفنا هو إن ندخل هواء

نخلط باقي المقادير ونضيف لهم الطحين بالتدريج

نخليه يتخمر 4 ساعات على الأقل ..

أمي الله يطول بعمرها تسويه قبل بليلة وتتركه يتخمر طول الليل وتكرفنا ثاني يوم من الصبح :))

نصبه بالملعقة على زيت حار ونحمره من الصوبين

احتمال كبير إن أول كم تجربة يطلعون مشوهين بس في النهاية بتضبط معاكم P=

فيه ألف عافية