سلطة تونا

بسم الله الرحمن الرحيم

 بيتنا كله مسوي ريجيم وما يساعدني عالإبداع !!

العيش ممنوع
الخبز ممنوع
المكرونة ممنوعة
الزيت ممنوع
حتى المنجا والموز ممنوعين !!

اللي يحبون السلطات والأكلات الخفيفة بيستانسون معاي هالفترة
واللي يحبون يضربون بالخمس أنا حاسة فيكم والله .. مانقول غير الله كريم :'(

دايماً أسوي سلطة التونا مع مايونيز
بس نظراً لأنه صار من المحرمات قررت أدور بديل صحي أكثر

ويالهول ما وجدت !

هالصلصة أحلى من صلصة المايونيز بمراااااحل

اختاروا الخضار اللي تفضلونها

أنا حطيت فاصوليا حمراء .. زيتون أسود .. فليفلة .. مخلل .. وبقدونس .. وطبعاٌ علبة تونا

من ضمن الاختيارات : كرفس مفروم .. جزر مبشور .. بصل أخضر مفروم .. فاصوليا بيضاء .. وغيرهم وايد 
 

للصلصة

 ربع كوب / عصير ليمون

2 م ك / خل بلسمك

م ك / زيت زيتون

نص م ص / فلفل مجروش

ملح وفلفل أسود  
 

فيه ألف عافية

قرص عقيلي

بسم الله الرحمن الرحيم

 
العقيلي من الحلويات الخليجية اللذيذة
هو باختصار عبارة عن كيكة خنفروش .. ومع إن هالوصفة ما كانت (خنفروشية) وايد
بس طعمها كان أروع من إني أحتفظ بالوصفة لنفسي

عادة نسوي العقيلي بقالب الكيك اللي مفرغ من النص
بس فضلت أستخدم نفس شكل القالب بالحجم الميني لأنه أسهل في التقديم

 المقادير

4 بيضات كبار
م ص / فانيليا سائلة
ربع كوب / حليب سائل
ربع كوب / روب
1 ونص م ص / زعفران مفتت
نص م ص / هيل مطحون
2 م ك / ماي ورد
4 م ك / زيت
2 م ص / BP
كوب / سكر ناعم
كوب ونص / طحين
هردة ( طحينية )
سمسم محمص



الطريقة

نشغل الفرن على 170 درجة

ندهن القالب بالهردة

  نرشه بالسمسم ونحركه عشان نغطي جميع الجوانب

أنا حبيت أكثر من السمسم بس تقدرون تتحكمون بها حسب الرغبة

نقلب القالب ونضربه بخفة عشان نتخلص من كمية السمسم الزايدة



ننقع الزعفران والهيل في ماي الورد 5 دقايق

وبعدين نخلطهم مع الحليب والروب والزيت ونتركهم على جنب

 


نخفق البيض مع الفانيليا لين ينفش ويصير مثل الكريمة
نحط معاه السكر والبيكنج بودر ونخلط عشان يذوب السكر

نبدا نضيف الطحين & خلطة السوائل بالتناوب لين تخلص الكمية
نحاول ندخل أكبر كمية من الهواء في هالخطوة

نصب العجين في القالب

في حال حبيتوا تستخدمون الحجم الصغير مثل ما أنا سويت تقدرون تستخدمون كيس الكريمة للتسهيل

وندخلها الفرن لمدة 12 - 15 دقيقة





فيه ألف عافية



بف باستري بحشوة الدجاج

بسم الله الرحمن الرحيم

 طبق جانبي - شبه سريع - لذيذ ونجاحه مضمون

طرق التقديم ممكن تختلف حسب الرغبة

تقدرون تسوونها مثل اللي في الصورة .. أو مثلثات .. مربعات

أو تحطون عجينة البف بيستري في قوالب المفن وتحشونها وترشونها بجبن وتدخلونها الفرن وتستمتعون بالطعم

المقادير

قطعتين صدر دجاج بدون جلد ولا عظم

بصلة متوسطة مفرومة

حبة فليفلة مفرومة

جزرة كبيرة مبشورة

نص كوب مشروم مفروم

ربع كوب بقدونس مفروم

م ك / قشطة ( قيمر )

م ك / جبن كاسات

2 م ك / مايونيز بالثوم

مكعب ماجي

ملح

فلفل أسود

الجبن اللي تفضلونه ( شيدر - موزاريلا - ... )

الطريقة



نفوح صدور الدجاج مع بصلة صغيرة وعود دارسين وفلفل أسود صحيح وقرنفل وورقة غار .. بعد ماتستوي نسحّبها أو نقطعها لمكعبات صغيرة

نحمس البصل في شوية زيت لين يصير لونه ذهبي

نضيف عليه الماجي والخضار والملح والفلفل .. نحمس شوية وبعدين نحط عليهم الدجاج والبقدونس

نخلط معاهم الجبن والمايونيز والقشطة .. وصارت الحشوة جاهزة

نحشي بها البف باستري ونرش عليها جبن مبشور وندخلها الفرن على 170 لين تستوي العجينة

فيه ألف عافية

رز باللبن

بسم الله الرحمن الرحيم

 

 

الرز باللبن ( أو الرز بالحليب ) من ألذ الحلويات المصرية

السر عشان نضبطه هو إن نعرف الكثافة اللي لما يوصل لها نطفي النار ونصبه في صحون التقديم

وإذا ما ضبط وصار جامد .. الحل سهل

نخلط في ملّه ( حليب + سكر + قشطة ) ونخلطها معاه وبس ^_^

 

الوصفة من عند أمي .. يعني بدون مقادير محددة

لكنها سهلة ومافيها أي صعوبة ..

حاولت وأنا أسويه إني أحط مقادير تقريبية ممكن تختلف من شخص لثاني حسب الذوق

 

 

المقادير

جيلتين عيش مصري

ماي ( عشان نطبخ به العيش )

حليب ( لترين إلى 3 لترات )

4 فناييل / سكر ( أو حسب الرغبة )

م ك / سكر ( إضافية )

قطعة مستكة صغيرة ( لازم تكون صغيرة عشان ماتعطي مرورة )

ثمن م ص / ماي زهر
مكسرات وزبيب حسب الرغبة ( للتزيين )

 

 

الطريقة
 

 ندق المستكة مع ملعقة سكر
ونذوب باقي كمية السكر في الحليب ونضيف عليها المستكة وماي الزهر
 

نطبخ العيش كالعادة .. ويكون مستوى الماي فوق مستوى العيش بـ2 سم تقريباً

 

نصب الحليب عالعيش بعد مايستوي

نخلي مستوى الحليب فوق مستوى العيش بحوالي 4 سم

نسكر الجدر ونخليه يطبخ زين ما زين عشان ياخذ العيش كل النكهات

 

 

إذا حسيناه خفيف وايد نذوب نص ملعقة نشا في كوب حليب بارد ونصبه عليه ونقلبه شوي

 

نصبه في ملال التقديم أو في ملة كبيرة ونزينه مثل مانحب وندخله الثلاجة لين وقت التقديم

 

 

 

 

 

فيه ألف عافية 

عيش بالزعفران

بسم الله الرحمن الرحيم

المقادير

جيلتين عيش بسمتي

ماي ( عشان نطبخ به العيش )

م ك / ملح

2 م ك / زيت

نص م ص / زعفران

2 م ك / ماي ورد

3 م ك / زبدة

نص كوب / زرشك أو زبيب

الطريقة

ننقع الزعفران في ماي الورد .. والزبيب أو الزرشك في ماي عادي عشان يلين
نغسل الماي كذا مرة وننقعه لمدة نص ساعة
نحط الزيت والملح مع الماي ونخليه يفور بقوة
نضيف العيش بحيث يكون مستوى الماي أعلى من مستوى العيش بمقدار صبع تقريباً
بعد مايستوي العيش نصفيه من الماي .. ونصفي الزبيب من الماي
في جدر ثاني نحمس الزبيب في 3 ملاعق زبدة على نار متوسطة 
وممكن نحمس معاه مكسرات حسب الرغبة (فستق .. لوز .. صنوبر ...)
نضيف نص كمية العيش وماي الورد والزعفران ونقلب لين ياخذ العيش لون الزعفران  
نخفف النار ونضيف باقي العيش .. نغطي الجدر ونتركه 5 دقايق
وصار جاهز ^__^

فيه ألف عافية

كاري الدجاج

بسم الله الرحمن الرحيم

 

 

 

كاري الدجاج أكلة هندية غنية بالبهارات

ممكن تكون حارة أو بدون فلفل حسب رغبتكم

شخصياً أفضل الأكل الحار ..

بس يوم سويت هالطبخة كانوا عندنا يهال صغار فـ استغنيت عن الفلفل

 

المقادير

4 م ك / زيت ذرة أو كانولا

حبة بصل كبيرة ( مفرومة )

4 قطع صدور دجاج كبيرة ( مقطعة لمكعبات متوسطة )

فصين ثوم ( مهروسين )

1 م ك / زنجبيل ( مهروس )

فلفل أخضر حار ( اختياري / الكمية حسب الرغبة )

1 م ص / ملح

ربع م ص / فلفل أسود

1 م ص / بهارات كاري

نص م ص / كركم

نص م ص / كمون

نص م ص / كزبرة

نص م ص / فلفل مجروش ( اختياري )

نص م ص / بابريكا

2 م ك / معجون طماطم

حبتين طماطم كبار ( نضربها في الخلاط )

كوب كريمة سائلة

2 م ك / كزبرة خضراء مفرومة ( أو بقدونس )

 

الطريقة

 

 نحمّي الزيت في جدر كبير ونضيف عليه البصل .. نقلبه لين يلين ويتغير لونه

 

نضيف الدجاج ونقلبه لين يتحمر ..

ونضيف له الثوم & الزنجبيل & الفلفل ونقلب لين تطلع ريحة الزنجبيل والثوم

 

 

نضيف البهارات ( الملح + الفلفل الأسود + الكاري + الكمون + الكزبرة + الكركم + البابريكا + الفلفل المجروش )

 

 

 

نضيف الطماط & معجون الطماط

نقلّب على نار قوية لمدة 5 دقايق

 

 

نضيف الكريمة ونخلطها مع الدجاج لين يندمجون عدل

 

 

نضيف البقدونس أو الكزبرة الخضراء

نغطي الجدر ونتركة لمدة 7 دقايق تقريباً لين يستوي الدجاج

 

 

للأمانة .. الوصفة الأصلية لـ منال العالم

وغيرت شوي فيها عشان تتناسب مع اللي يحبونه هلي

 

 

 

فيه ألف عافية

القهوة العربية ~ الطريقة القطرية

بسم الله الرحمن الرحيم

لعيون أختي الغالية بحط اليوم طريقة القهوة القطرية

وحده من أهم رموز الضيافة في ثقافتنا

والمرافق الدائم للحلو والتمر

مقاديرها

لتر ماي { مايكون حار ولا بارد }

فنيال { فنجال } قهوة عربية شقرا ومطحونة .. أنا أستخدم بن القطان الكحلي

نص فنيال هيل مطحون

م ص بهارات الإحساء للقهوة

م ص بهارات القصيم للقهوة

  

زعفران

الطريقة

1) نحط الماي + القهوة على نار متوسطة ونخليهم لين تفور القهوة

لين فارت نقصر عالنار ونخليها تطبخ ربع ساعة عالأقل

2) نحط الهيل + البهارات + الزعفران في الدلة

أنا أحب أكثّر من البهارات القصيمية وأقلل من الحساوية لأن الحساوية فيها مسمار { قرنفل } وايد

وبعد شفت في السوق بهارات إيرانية للقهوة بس ماجربتها !

3) نصب شوي من القهوة في الدلة ونسكرها ونخضها عشان نخلط البهارات مع القهوة

بعدين نصب فيها باقي القهوة ونخضها ,, وبعدين نخليها تركد شوي

ونكون خلصنا ^_^

فيه ألف عافية